Хрватска ја враќа задолжителната воена обука од јануари 2026 година
Во Хрватска од јануари 2026 година повторно ќе се воведе задолжителната основна воена обука, која ќе трае два месеца. За тоа време, регрутите ќе добиваат месечен надомест од 1.100 евра, а обуката ќе им се пресметува како работен стаж, објави државната новинска агенција ХИНА.
Министерот за одбрана Иван Анушиќ и началникот на Генералштабот на вооружените сили, Тихомир Кундид, официјално ги претставија клучните документи за повторното активирање на оваа обврска, која беше укината во 2008 година.
Обука или цивилна алтернатива
Лицата кои, поради верски, етички или други убедувања, ќе побараат ослободување од воена служба, ќе имаат можност да изберат цивилна алтернатива – тримесечна обука за цивилна заштита или четиримесечен ангажман во локални институции, пет работни дена неделно по осум часа.
„Воената обука ќе ги опфати основните вештини што ги поседува секој војник – ракување со оружје, тактичка подготовка, прва помош и друго суштинско знаење неопходно за справување со кризни ситуации“, изјави Анушиќ.
Предности при вработување и флексибилни услови
Регрутите што ќе ја завршат обуката ќе имаат предност при вработување во јавниот сектор и државните компании. Предвидено е измените на Законот за одбрана да бидат усвоени во парламентот во текот на септември или октомври, по што ќе следува испраќање на покани до околу 20.000 млади кои ќе поминат медицински прегледи.
Хрватските државјани автоматски се впишуваат во воениот регистар на 18 години, а обуката ја започнуваат во годината кога полнат 19. Воениот и цивилниот ангажман можат да се одложат до 29-годишна возраст заради студии, додека професионалните спортисти можат да добијат одложување до една година поради меѓународни обврски.
Жените нема да имаат обврска за учество, но ќе можат доброволно да се пријават за воената обука.
Финансиски и јавен одзив
Според проценките, годишниот трошок за воената обука ќе изнесува околу 20 милиони евра, а цивилната алтернатива ќе чини приближно 15 милиони евра.
Истражување на Министерството за одбрана спроведено врз 12.000 испитаници покажало дека 62% од граѓаните го поддржуваат повторното воведување на обуката, а 67% би се одѕвале на повик за служба.
Како што посочи министерот Анушиќ, одлуката е донесена како одговор на променетата глобална безбедносна слика, зголемените климатски катастрофи и потребата од градење на подготвени резервни сили.
