Инсценирана драма? Кремљ под сомнеж по „нападот“ врз Путин
Тврдењето на руското Министерство за одбрана дека претседателот Владимир Путин се нашол „во епицентарот на напад со дрон“ се покажува како внимателно осмислен медиумски перформанс од страна на Кремљ, пренесува независниот портал The Moscow Times.
Според руските државни медиуми, инцидентот се случил за време на неодамнешната посета на Путин на Курската област – негова прва од почетокот на воените дејствија во регионот – кога, наводно, украински дронови го нападнале хеликоптерот со кој патувал. Но, како што наведува The Moscow Times, станува збор за инсценирана епизода, а не за реален борбен напад.
Четири извори од внатрешноста на владата и Кремљ тврдат дека безбедносните служби намерно ја промовирале драматичната приказна за да создадат слика на лидер кој не се крие зад линиите на фронтот, туку, напротив, лично ги споделува ризиците и жртвите со народот.
Во контекст на зачестените напади со дронови, хаосот на аеродромите и прекините во мобилната комуникација низ Русија, овој телевизиски трик имал за цел да испрати порака: „војната е реална, а претседателот е дел од неа“.
Според пишувањата на порталот, Путин навистина ја посетил Курската област – зона која често е цел на украински напади – но безбедносните мерки биле на највисоко ниво.
„Никој никогаш не би дозволил таков степен на безбедносен немар. Дури ни во најлош кошмар,“ изјавил висок владин претставник близок до претседателската администрација.
Она што дополнително го засилува сомнежот е фактот дека на посетата не присуствувале ниту новинари блиски до Кремљ, ниту официјална снимателска екипа. Наместо тоа, видеоматеријалот бил снимен од припадници на обезбедувањето, откриваат два независни извори.
Во меѓувреме, украинскиот Центар за стратешки комуникации и информациска безбедност категорично ги отфрли тврдењата дека вооружените сили на Украина извршиле напад врз хеликоптерот на Путин во Курската област.
