Татковината не се менува, не се напушта и не се продава – таа се брани и се гради, рече премиерот Мицкоски на престижната меѓународна конференција на конзервативната политичка акција CPAC, која се смета за најголем и највлијателен собир на конзервативните партии во светот.
Во говорот Мицкоски се осврна и на идентитетот, велејќи дека Македонија, иако мала, никогаш не се откажала од својот идентитет, а некој со лажни наративи сака да го избрише.
„Татковината не се менува, не се напушта и не се продава – таа се брани и се гради! Македонија, иако мала, никогаш не се откажала од својот идентитет. Низ нашата многувековна историја научивме дека слободата се плаќа со жртви. Денес, во духот на соработката, длабоко ја цениме поддршката на нашите стратешки партнери, како што впрочем е и Унгарија – чиј пример нè инспирира уште повеќе да ги застапуваме вредностите во кои веруваме. Како што вели една македонска народна мудрост: „Еден човек може да направи разлика, но сите заедно можеме да направиме историја. Нека Господ го благослови нашиот заеднички пат! “
Патриотизмот не е некаква ретроградна идеја, туку е единствениот пат кон просперитетна иднина, изјави македонскиот премиер Христијан Мицкоски на обраќањето на конференцијата CРАС во Будимпешта
За Мицкоски постојат три клучни конзервативни вредности, Бог, татковината и семејството.
– Денеска на оваа престижна меѓународна платформа се собираме со чувство на одговорност, но не само како претставници на различни нации и држави, туку како носители на заеднички идеали, идеали кои ги одбележаа најсветлите моменти во историјата на човештвото. Доаѓам од држава која е во срцето на Балканот, со длабоки корени, но и со визија за иднината. Вековите нè научија дека вистинската сила доаѓа од верноста кон вечните вредности за кои не треба да се прават компромиси. Живеејќи во време кога лажните наративи се обидуваат да ги релативизираат нашите национални идентитети, ние сме тука да го докажеме спротивното. Првин, Бог. Бог, не како апстрактна идеја, туку како жив творец кој нè повикува на правда и на милосрдина. Во време кога христијанските вредности се напаѓаат ние сме повеќе од сигурни дека никогаш нема да се откажеме од духовноста, од наследството на светите браќа, рамноапостолите Кирил и Методиј од Македонија ја донесоа писменоста во целиот свет.
Премиерот истакна дека Македонија никогаш не се откажала од својот идентитет кој не е само географија, туку живо ткиво, татковина изградена од вредности и стремежи.
– Второ, татковината, не е само географски поим, таа била и ќе продолжи да биде живо ткиво создадено од историја, традиција и заеднички стремежи. Татковината не се менува, не се напушта и не се продава. Таа се брани и се гради. Македонија, иако мала земја, никогаш не се откажалa од својот идентитет. Низ нашата многувековна историја научивме дека слободата се плаќа со жртви. Денес, во духот на соработката длабоко ја цениме поддршката од нашите стратешки партнери, како што впрочем е и Унгарија.
Мицкоски потоа го спомна традиционалното семејство, како една од основните клетки на општеството.
– Се присеќавам и на еден впечатлив говор на американскиот претседател, кој рече дека, основната потреба на нашето време е да имаме нации кои ќе ги бранат своите култури, граници и вредности. Ние, пак, застапниците на овие вредности, имаме обврска оваа идеја да ја прифатиме, афирмираме и да ја реализираме. И конечно, семејството, најсветата институција која ја создал Бог. Денес кога некои се обидуваат да го редефинираат семејството, ние пробуваме да ја заштитиме таа основна клетка на општеството. Многу добро знаеме дека секоја нација е силна колку што се силни нејзините семејства. Да го заштитиме традиционалното семејство.
Мицкоски му заблагодари на унгарскиот премиер Виктор Орбан велејќи дека тој е редок лидер во Европа кој ги промовира политика на цврсти зборови како карпа, каде што зборот е збор. Мицкоски вели дека Орбан треба да биде поддржан, како и Трамп, кој, „е политичар кој води политика на раст и на враќање на надежта“.
Премиерот Христијан Мицкоски денеска во Будимпешта имаше средба со претседателот на Владата на Унгарија, Виктор Орбанr.
Мицкоски на Фејсбук објави дека разговорот бил фокусиран на одличната билатерална соработка помеѓу Македонија и Унгарија, како и на можностите за нејзино натамошно продлабочување.
„Во разговорот нагласив дека Македонија останува цврсто посветена на својот европски пат, на остварувањето на европската перспектива и на зачувувањето на стабилноста во регионот. Изразив благодарност за постојаната поддршка од страна на Унгарија со уверување дека стратешкото партнерство ќе продолжи да се развива со уште поголема динамика – наведува во објавата претседателот на македонската Влада.“
На конференцијата во Будимпешта меѓу другите гости се и словачкиот премиер Роберт Фицо, Андреј Бабиш од Чешка, Јержи Квашњевски и Матеуш Моравиецки од Полска, Алис Вајдел од Германија, како и американските десничарски ѕвезди Бен Шапиро, Џек Пособиец и Дејвид Рубин..
