Ел Салвадор заплени 1,4 тони кокаин што плутал во Тихиот океан, соопшти претседателот Наиб Букеле, нарекувајќи ја акцијата „удар врз меѓународната трговија со дрога“.
Пратката е откриена околу 1.600 километри југозападно од Ел Кордонсиља, на вливот на Јалтепеке. Вредноста на запленетата дрога се проценува на 35 милиони долари.
Оваа акција следи во време кога американскиот претседател Доналд Трамп објави „војна“ против латиноамериканските картели, прогласувајќи ги за терористички организации. Вашингтон веќе распореди воени бродови кон Венецуела и нареди ракетен напад врз сомнителен брод за шверц, при што загинаа 11 лица.
Букеле истакна дека од 2024 до 2025 година Ел Салвадор запленил вкупно 37,2 тони кокаин во вредност од 932 милиони долари. Американската амбасада ја поздрави акцијата, нагласувајќи дека секој успешен удар врз криминалните мрежи ја зајакнува соработката меѓу партнерите.
Според проценките на САД, околу 90 проценти од кокаинот што стигнува на нивниот пазар минува низ Мексико и Централна Америка со мали авиони, чамци и мини-подморници.
