Прелиминарните извештаи укажуваат дека руските дронови намерно влегле во воздушниот простор на Полска, изјави високата претставничка на ЕУ за надворешна политика и безбедност, Каја Калас.
„Руската војна ескалира, таа не завршува. Мора да ги зголемиме трошоците за Москва, да ја зајакнеме поддршката за Украина и да инвестираме во европската одбрана. ЕУ има клучна улога и ќе поддржи иницијативи како источниот одбранбен штит“, порача Калас на мрежата Х.
Таа додаде дека е во контакт со генералниот секретар на НАТО, Марк Руте, и со полскиот министер за надворешни работи, Радек Сикорски.
Полските власти претходно потврдија дека руските дронови влегле во нивниот воздушен простор, по што воздухопловството употребило вооружување за нивно соборување. Полската армија го нарече инцидентот „чин на агресија“ што ја загрозил јавната безбедност.
Премиерот Доналд Туск изјави дека Варшава го известила генералниот секретар на НАТО за преземените мерки и дека операцијата за пресретнување на дроновите сè уште трае.
