Генералниот секретар на НАТО, Марк Руте, во интервју за „Њујорк Тајмс“ најави дека земјите членки на Алијансата ќе почнат да воведуваат задолжителна воена служба како одговор на зголемената руска закана. Тој посочи дека многу држави ги зајакнуваат своите граници и го зголемуваат буџетот за одбрана, согласно договорот на последниот самит на НАТО.
Руте истакна дека не се загрижува поради трката во вооружувањето меѓу Европа и Русија, но дека тоа може да претставува предизвик за целата Алијанса. „Мораме да обезбедиме дека одвраќањето постои. Коментарите на Лавров се доказ дека тоа функционира. Русија е целосно подготвена за војна – ја зголемува својата армија, инвестира во тенкови, системи за противвоздушна одбрана, артилерија и муниција“, рече Руте.
Во врска со воведувањето на воен рок, тој нагласи дека одлуката е на секоја земја поединечно. „Некои веќе имаат задолжителна служба, како Финска, додека други не. Но, тоа ќе значи и подобра плата за војниците. Најголем предизвик ни е развојот на одбранбената индустрија, која е слаба во целата Алијанса. Недостасува производствен капацитет за оружје, што е клучно за да се осигураме дека можеме да одвратиме секој потенцијален напад“, објасни Руте.
Тој ја коментираше и неодамнешната вежба во Естонија, која беше наменета за тестирање на подготвеноста за евентуална руска инвазија. „Она што го опиша ‘Њујоркер’ е точно, но тоа не е аларм, туку дел од нашите планови. Ако Естонија биде нападната – а Русите тоа го знаат – нашата реакција ќе биде разорна. Не можам да откривам детали, но Путин ги следи овие активности. Мораме да бидеме сигурни дека не само што ги имаме плановите, туку и доволно луѓе и опрема за нивна поддршка. Затоа мора да вложуваме повеќе“, порача Руте.
Тој нагласи дека Естонија не е сама, туку дека НАТО и САД ќе ѝ пружат целосна поддршка во случај на напад. „Путин тоа го знае и затоа денес нема да ја нападне Естонија, но тоа може да се случи во следните пет до седум години ако не ги направиме овие дополнителни вложувања“, заклучи генералниот секретар на НАТО.
