Руски напади низ Украина: Загинаа најмалку 13 цивили, повредени 57
Во текот на изминатите 24 часа, руските сили извршија масовни напади врз повеќе украински региони, при што, според официјалните извори, загинаа најмалку 13 цивили, а 57 лица се повредени, јавува Кијив Индепендент.
Според украинските воздухопловни сили, Русија употребила вкупно 368 парчиња воздушно оружје – меѓу кои 352 борбени дронови, 11 балистички ракети „Искандер-М/КН-23“ и 5 крстосувачки ракети „Искандер-К“. Главна цел на нападите бил главниот град Киев, каде што украинската ПВО успеала да пресретне и уништи 354 проектили.
Киев и околината на удар
Во Киевската област, гувернерот Микола Калашник соопшти дека едно лице загинало во Билоцеркивка, додека две лица се хоспитализирани, а уште две добиле медицинска помош на лице место. Во нападите се оштетени домови во Бориспиљ, Била Церква и Буча. Во Била Церква е уништен и медицински објект лоциран во хотел.
Во самиот Киев, градоначалникот Виталиј Кличко потврди шест загинати и најмалку 25 повредени, меѓу кои и бремена жена и дете, спасени од урната 25-катна зграда во населбата Шевченковски.
Херсон: Нови жртви и уништена инфраструктура
Во Херсонската област, гувернерот Олександр Прокудин информира дека руските сили го нападнале регионот со беспилотни летала, артилерија и воздушни удари. Нападите предизвикале штети врз седум станбени згради, 14 куќи, гасовод, гаражи и возила. Едно лице загинало, а шест се ранети. Во утринските часови на 22 јуни се повредени уште три лица.
Напади и во источна и северна Украина
Во Донецката област, гувернерот Вадим Филашкин соопшти дека во градовите Сиверск и Мирн загинале две лица, а пет се ранети. Податоците не ги вклучуваат жртвите во окупираните територии како Мариупол и Волноваха.
Во северната Черниговска област, најмалку три лица загинале, а 11 се повредени – меѓу нив и четворица тинејџери. Нападите предизвикале сериозни оштетувања врз домови, деловни објекти и инфраструктура во градовите Чернигов, Нижин, Прилуки, Корукивка и Новгород-Сиверски, изјави гувернерот Вјачеслав Чаус.
