На плажата Олимпик Бич во Грција, се случи херојски чин кој спречи трагедија. Неименуван млад човек од Србија спаси постар маж од Скопје кој се давеше во морето, објави „Телеграф“, повикувајќи се на Фејсбук страницата Grčka info.
Инцидентот се случил во средата, кога постариот човек и неговата сопруга влегле во морето, држејќи се за раце. Жената знаела да плива, но нејзиниот сопруг не. Двојката се оддалечила околу 50 метри од брегот, каде што водата им била до половината, кога во близина се слушнале повици за помош.
Сведоци раскажуваат дека млада девојка започнала да вика за помош, што веднаш активирало млад Србин кој бил на лежалка на плажата. Без двоумење, тој влетал во водата и успеал да го извлече човекот на безбедно.
Среќна околност е што на плажата се нашла и девојка докторка, која веднаш започнала со реанимација. По неколку минути, скопјанецот започнал да покажува знаци на живот – ги мрднал рацете и нозете, а потоа пристигнала и брза помош која го транспортирала во болница.
Благодарение на брзата реакција на случајните минувачи, храброста на младиот спасител и интервенцијата на медицинската работничка, животот на човекот бил спасен. Случајот е уште еден потсетник за значењето на човечката солидарност и присебноста во итни ситуации.
