Бербата на кафе од сортата Робуста, вклучувајќи ја и високоценетата Конлон, оваа година бележи одличен напредок во Бразил и би можела да ги надмине претходните прогнози, соопштија експерти од индустријата. Според нив, успешната жетва може да доведе до намалување на глобалните цени на кафето.
„Земјоделските податоци укажуваат на извонредни приноси, а моменталните очекувања се дека родот ќе ја надмине проекцијата“, изјави за Reuters Јонас Фераресо, агроном специјализиран за кафе, кој работи како советник на бразилски земјоделци. Тој додаде дека сите досегашни показатели упатуваат на можноста за рекордно добра сезона.
Според Cooabriel, најголемата задруга за производство на кафе од сортата Конлон во Бразил, жетвата е во полн ек во југоисточната покраина Еспирито Санто. Претседателот на задругата, Луис Карлос Бастианело, информира дека досега е завршена околу една четвртина од овогодишната жетва. Податоците на брокерската куќа StoneX покажуваат дека до 26 мај се прибрани 23,4 отсто од вкупниот очекуван годишен род на Робуста кафе за 2025 година.
„Очекуваме жетвата годинава да биде значително поголема, можеби и подобра од онаа во 2022 година. Притоа, се предвидува и висок квалитет на зрното“, изјави Бастианело. Се проценува дека оваа година во Еспирито Санто ќе се произведат повеќе од 17 милиони вреќи кафе, секоја со тежина од 60 килограми, пренесува Financije.
За споредба, во рекордната 2022 година биле собрани околу 16 милиони вреќи, што значи дека родот оваа година би можел да биде за околу 6 отсто, или околу 60.000 тони поголем. Обилните врнежи што ја зафатија областа за време на жетвата не се сметаат за пречка, туку како најава за уште една добра жетва и следната година.
Пад на цените на меѓународниот пазар
Во меѓувреме, цената на кафето на светскиот пазар е во пад, изјави Фернандо Максимилијано, пазарен аналитичар за кафе во StoneX.
„Цените на Робуста во последните неколку недели бележат значителен пад. Тоа е јасен показател дека новата берба пристигнува“, рече тој.
Минатата недела, цената на Робуста кафето на берзата ICE падна на најниско ниво во последните пет и пол месеци, достигнувајќи 4.550 американски долари по тон.
Како последица на потенцијално рекордната понуда, расте притисокот врз производителите на Робуста, кои се обидуваат да го продадат родот што е можно побрзо, пред дополнително намалување на цените.
„Производителите се загрижени како зголемената понуда би можела да влијае на цените во наредните месеци“, вели Максимилијано.
Сепак, според аналитичарите, овој развој најверојатно нема веднаш да се одрази врз цените за потрошувачите, бидејќи пазарот на кафе сè уште закрепнува од кризата што започна со пандемијата, а кулминираше со историски лошата берба во 2022 година. Потребно е време за стабилизирање на пазарот, заклучуваат експертите.
