Ако сте гладни додека сте на диета – веројатно правите нешто погрешно
Чувството на глад за време на диета не е нормално, предупредуваат нутриционистите. Тоа е сигурен знак дека нешто не е во ред – или внесувате премалку калории, или јадете храна што не ви обезбедува доволно ситост и хранливи материи.
Според стручњаците, клучот за успешно и здраво слабеење е да се чувствувате сити – само така ќе можете да ја одржите новата навика на исхрана и да ги постигнете посакуваните резултати. Но, ситоста не се постигнува со глад и ограничувања, туку со правилен избор на намирници.
Јадете повеќе, но паметно
Стратегијата што нутриционистите ја препорачуваат е проста: јадете поголеми количини нискокалорична, целовита храна. Тоа значи свежо овошје и зеленчук со висока содржина на вода и растителни влакна, кои природно заситуваат и го забрзуваат метаболизмот.
Овие намирници не само што помагаат во слабеењето, туку се и богати со витамини, минерали и антиоксиданси кои се неопходни за добро здравје. За разлика од преработената храна, која содржи многу сол, шеќер и нездрави масти, природната храна ви овозможува да јадете повеќе без да внесувате вишок калории.
На пример, 100 грама чипс содржат околу 535 калории, додека истата количина краставици, тиквички или зелена салата има само 15–20 калории. Со свесен избор на храна, можете да намалите дури 500 калории дневно, што значи губење на еден килограм неделно – на здрав и одржлив начин.
Што да вклучите во исхраната?
Во вашето мени вклучете:
Лиснат зеленчук: кељ, зелка, спанаќ
Зеленчук со ниска калориска вредност: краставици, тиквички, пиперки, целер, домати
Крстест зеленчук: брокула, карфиол, бриселско зелје
Овошје: боровинки, јагоди, малини, капини
Агриси: портокали, мандарини, грејпфрут
Сезонско овошје: лубеница
Оваа храна не само што заситува, туку и го поддржува имунитетот и здравјето на целиот организам.
Избегнувајте еднострани диети
Но, важно е да не се претерува. Диета базирана само на нискокалоричен зеленчук и овошје може да доведе до чувство на глад, нутритивни дефицити, па дури и дигестивни проблеми – како надуеност и гасови – поради преголем внес на растителни влакна без доволно протеини и масти.
Секој оброк треба да биде балансиран – со умерени количества протеини (како јајца, јогурт, пилешко, мешунки) и здрави масти (како авокадо, маслиново масло, јаткасти плодови).
Ако не сте сигурни што точно да јадете и како да го прилагодите вашиот начин на исхрана, најдобро е да се консултирате со матичен лекар или нутриционист. Тие можат да ви помогнат да креирате план што одговара на вашите потреби и цели, без да го загрозите здравјето.
