Пад на Волстрит поради Тесла, пазарот делумно стабилизиран од разговорот Трамп – Си
На Волстрит, берзанските индекси завршија во минус, пред сè поради остриот пад на акциите на „Тесла“, додека пазарот доби умерена поддршка по веста за телефонскиот разговор помеѓу американскиот претседател Доналд Трамп и неговиот кинески колега Си Џинпинг.
Индексот Dow Jones се намали за 0,25 проценти и се спушти на 42.319 поени, S&P 500 изгуби 0,53 проценти, достигнувајќи 5.939 поени, додека технолошкиот Nasdaq падна за 0,83 проценти, на 19.298 поени.
Акциите на „Тесла“ загубија повеќе од 14 проценти од својата вредност, откако јавната конфронтација меѓу извршниот директор Илон Маск и поранешниот претседател Трамп дополнително се заостри. Ова е четврти пад на акциите во последните пет трговски денови, при што компанијата изгуби околу 150 милијарди долари пазарна вредност.
Маск во последните денови ја засили критиката кон законот за даночни стимулации на претседателот, додека Трамп изјави дека Маск е фрустриран поради укинувањето на даночните олеснувања за електричните возила.
„Импликациите за Тесла се очигледни. Но, не очекувам значајно влијание врз поширокиот пазар, освен незначително влијание врз индексите. Пазарот има и други, подлабоки предизвици, а Тесла не е меѓу најсериозните“, изјави Марк Шпигел, портфолио менаџер во „Стенфил Капитал“.
Сепак, берзите добија позитивен импулс по веста за телефонскиот разговор меѓу Трамп и Си, иако деталите од дискусијата не се објавени. Познато е дека двајцата претседатели се поканија на официјални државни посети, што од страна на пазарите беше оценето како сигнал за смирување на тензиите поради неодамнешниот спор околу клучните минерали.
Инвеститорите исто така внимаваа на изјавата на Џеф Шмид, претседател на Федералните резерви на Канзас Сити, кој предупреди дека царинските давачки би можеле повторно да ја разгорат инфлацијата и дека ценовниот притисок може да се зголеми во наредните месеци.
Изјавите на Шмид укажуваат дека каматната стапка на Федералните резерви најверојатно ќе остане непроменета на следниот состанок на 17 и 18 јуни, а веројатно и подоцна. И покрај притисоците од Трамп за намалување на каматните стапки, претседателот на ФЕД, Џером Пауел, останува воздржан, очекувајќи дополнителни макроекономски показатели во услови на висока неизвесност.
И европските берзи реагираа со претежно позитивно движење, откако Европската централна банка го намали клучниот каматен процент за дополнителни 0,25 процентни поени. Лондонскиот индекс FTSE порасна за 0,11 проценти и достигна 8.811 поени, DAX во Франкфурт се зголеми за 0,19 проценти на 24.323 поени, додека парискиот CAC забележа пад од 0,18 проценти, на 7.790 поени.
