Британскиот премиер Кир Стармер упати остро предупредување до Израел, најавувајќи конкретни мерки како реакција на продолжената воена офанзива во Појасот Газа и рестрикциите во доставата на хуманитарна помош.
„Премиерот повторно истакна дека, доколку Израел не ја прекине својата воена офанзива и не ги укине ограничувањата за хуманитарна помош, Обединетото Кралство, заедно со своите партнери, ќе преземе конкретни чекори како одговор“, изјави портпарол на Даунинг стрит по средбата на Стармер со јорданскиот крал Абдула Втори во Лондон.
Двајцата лидери разговарале за сериозноста на состојбата во Газа, како и за загрижувачките случувања на Западниот Брег.
„Клучно е да се обезбеди траен прекин на огнот, ослободување на сите заложници и итна и масовна испорака на хуманитарна помош“, додаде портпаролот.
Обединетото Кралство во мај ги суспендираше преговорите за слободна трговија со Израел и го врати својот амбасадор од Тел Авив во Лондон.
Министерот за надворешни работи на Велика Британија, Дејвид Лами, остро ја осуди владата на израелскиот премиер Бенјамин Нетанјаху поради проширувањето на воените операции.
Во обраќање пред британскиот парламент, Лами најави воведување санкции за поединци и организации кои се вклучени во изградба на нелегални населби на Западниот Брег.
„Лондон не може да остане со скрстени раце пред понатамошното влошување на состојбата во Појасот Газа“, изјави Лами.
Британската влада во средата повика на „итна и независна истрага“ за серијата смртоносни инциденти кои се случија во текот на неделата на локации за дистрибуција на хуманитарна помош во Газа.
