Увозот на стоки во САД забележа рекорден пад од речиси 20 отсто во април, што се смета за најголем месечен пад од 1992 година наваму, соопшти Бирото за попис во својот последен прелиминарен извештај. Причината е воведувањето нови царини од страна на претседателот Доналд Трамп, кои ги натераа компаниите да го намалат обемот на испораки.
Вкупниот увоз за април изнесуваше 276,1 милијарда долари, што претставува пад од 19,8 проценти во споредба со март. Остриот пресврт се случи по мартовскиот бран на увоз, кога компаниите брзаа да обезбедат странска стока пред новите царини што стапија на сила на 2 април, прогласен од администрацијата на Трамп за „Ден на ослободување“.
Податоците покажуваат сериозни нарушувања во глобалната трговија, со влијание врз американскиот БДП и потрошувачките навики на граѓаните. Потрошувачката, која во март порасна за 0,7 проценти, во април забави на само 0,2 проценти.
И покрај падот во првиот квартал, економистите очекуваат раст во вториот квартал. Федералните резерви на Атланта ја ревидираа прогнозата за раст на БДП од 2,2 на 3,8 проценти, што би бил најсилниот квартален раст од 2023 година. Слично, JPMorgan предвидува скок од 4 проценти, иако предупредува дека нестабилноста во трговијата може да создаде искривена слика за вистинскиот економски тренд.
Просечниот раст за првата половина од 2025 година, според нивните проценки, ќе изнесува околу два проценти.
