Руската делегација предводена од помошникот на претседателот Владимир Медински е подготвена да ѝ го претстави на Украина меморандум од Русија за сите аспекти на надминување на основните причини за конфликтот на 2-ри јуни во Истанбул, изјави во средата рускиот министер за надворешни работи Сергеј Лавров.
„Руската страна, како што е договорено, брзо разви соодветен меморандум, во кој се утврдува нашата позиција за сите аспекти на сигурно надминување на основните причини за кризата. Нашата делегација предводена од Владимир Медински е подготвена да ѝ го достави овој меморандум на украинската делегација и да ги даде потребните објаснувања за време на втората рунда од обновените директни разговори во Истанбул следниот понеделник, 2-ри јуни“, истакна тој.
Лавров, исто така, изрази благодарност до турските партнери за обезбедувањето гостопримлива турска платформа, како што потврди вчера турскиот министер за надворешни работи Хакан Фидан за време на неговата посета на Москва.
„Очекуваме дека сите оние кои се искрено, а не само со зборови, заинтересирани за успехот на мировниот процес, ќе поддржат одржување на нова рунда директни руско-украински разговори во Истанбул“, нагласи министерот.
Претходно во средата, портпаролот на Кремљ, Дмитриј Песков, на редовниот дневен брифинг со новинарите изјави дека работата на рускиот нацрт-меморандум за постигнување мир во Украина е завршена. Меѓутоа, истакна дека Кремљ нема да разговара за содржината на документите за Украина преку медиумите, за кои сè уште не е постигната согласност.
На 16-ти мај, во Истанбул се одржаа директни разговори меѓу делегациите на Русија и Украина првпат по март 2022 година, кога според многу извори бил веќе постигнат договор од кој подоцна Киев се повлече по инсистирање на поранешни челници на неговите западни сојузници.
По минатиот состанок во Истанбул, Москва и Киев се согласија да разменат затвореници според формулата „илјада за илјада“, да ја презентираат својата визија за евентуален ид3н прекин на огнот, детално образложувајќи го, и да го продолжат процесот на преговори.
Шефот на руската преговарачка делегација уште од почетокот на војната, Медински, кој е инаку помошник на претседателот Владимир Путин, изјави тогаш дека руската страна е задоволна од исходот од состанокот. Исто така, рече дека Украина побарала директни разговори меѓу челниците на државите, а Москва го зела „во предвид ова барање“. Меѓутоа, според руската дипломатска практика, таква средба може да се оствари на финализирање откако веќе ќе биде постигнат договор меѓу овластените преговарачки делегации.
