Анализа на говорот на телото: Гестот на Брижит Макрон кон сопругот предизвика глобално внимание
Познатиот аналитичар за говор на телото, Хесус Енрике Росас, познат на платформата Икс како „The Body Language Guy“, објави детална анализа на видео-снимката од инцидентот во кој францускиот претседател Емануел Макрон доби неочекуван удар од својата сопруга, Брижит Макрон, при нивното излегување од претседателскиот авион за време на официјална посета на Виетнам.
Иако на прв поглед настанот изгледа како лесен шамар, Росас укажува дека станува збор за силно двојно туркање во пределот на лицето – гест што носи длабока психолошка симболика.
Макрон неподготвен – тело опуштено, израз неутрален
Како што се гледа на снимката што се прошири на социјалните мрежи, непосредно пред гестот Макрон е целосно опуштен – држењето му е неутрално, лицето без израз, а левата рака мирно виси покрај телото. Според Росас, тоа укажува дека претседателот не очекувал никаква физичка реакција.
Два нивоа на гестот: Туркање, а не шамар
Наместо класичен шамар, Брижит Макрон, според Росас, ги користи двете раце за да го турне лицето на својот сопруг наназад – со силен и решителен потег. Во тој момент, според изразот на неговото лице, Макрон ја сфаќа тежината на ситуацијата: камерата го бележи моментот на понижување – во живо, пред светската јавност.
Обид за контрола пред камерите
По инцидентот, Макрон се обидува да задржи достоинство – поздравува присутни и несвесно ја потпира левата рака на потпирачот од седиштето. Тоа, според Росас, претставува „сидрен гест“ – инстинктивен обид за стабилизација и контрола во стресни моменти.
Брзо смирување, но емоционална дистанца
Францускиот претседател не излегува веднаш од авионот – останува кратко време за да се прибере. Потоа, при спуштањето по скалите, се обидува да ѝ подаде рака на сопругата, но Брижит го игнорира. Тој ја држи раката неколку чекори во воздух пред конечно да се откаже.
Обид за доминација преку поздрав
При средбата со виетнамски официјален претставник, Макрон подава рака со дланката свртена надолу – класичен знак на доминантност во невербалната комуникација. Според Росас, ова е инстинктивен обид за враќање на личната контрола и емоционална рамнотежа – барем во дипломатскиот контекст.
Потиснат гнев: Стисната тупаница и напната вилица
Фотографиите направени неколку минути подоцна го покажуваат Макрон со стегната лева тупаница и напнати зглобови – што, според анализата, е знак на потиснат гнев. Лицето му е затегнато, вилицата проширена, усните стегнати, а веѓите спуштени – сè тоа укажува на интензивна внатрешна емоција што се обидува да ја сокрие.
Заклучок: Понижување пред светот
„Ништо во оваа сцена не беше случајно или безначајно. Гестот, колку и да изгледа неформално, за Емануел Макрон претставуваше длабока емоционална повреда – и тоа пред камерите на целиот свет. Неговото тело кажа сè“, заклучува Росас.
