САД ја одобрија продажбата на хеликоптери на Босна и Херцеговина
Агенцијата за одбранбена безбедносна соработка при Стејт департментот го извести Конгресот за можната продажба на хеликоптери AW-119Kx на Босна и Херцеговина, со што е издаден потребниот сертификат за трансакцијата, објави американската влада.
Покрај леталата, пакетот вклучува обука и квалификација на пилоти, техничка и логистичка поддршка, специјализирана опрема за поддршка на авијацијата, како и присуство на претставници од американската влада и изведувачи на терен во Босна и Херцеговина во наредните пет години.
Како што се наведува во соопштението, продажбата ќе ги зајакне одбранбените капацитети на Оружените сили на Босна и Херцеговина (ОСБиХ), ќе овозможи подобра поддршка при хуманитарни мисии, спасувања и природни катастрофи, како и учество во регионални и НАТО вежби.
Стејт департментот нагласува дека оваа одлука е во согласност со надворешнополитичките и безбедносните интереси на САД и претставува поддршка за стабилноста и економскиот напредок на Европа.
Претходно, министерот за одбрана на БиХ најави дека земјата планира набавка на пет нови хеликоптери од Соединетите Американски Држави.
