Манчестер Сити се повлекува од трансферот на Флоријан Вирц
Манчестер Сити дефинитивно одлучи да се повлече од трансферот на фудбалерот Флоријан Вирц, откако проценија дека сумата која треба да се инвестира во неговото доведување е премногу висока.
Според информации, вкупниот трошок за трансферот на Вирц би достигнал околу 300 милиони евра, што не вклучува само отштетата за клубот, туку и повеќегодишната плата на фудбалерот и провизиите за неговите агенти. Во Манчестер Сити сметаат дека оваа сума е пренапумпана и решија да не се вклучуваат во лицитација со други клубови. Наместо тоа, нивното внимание ќе се насочи кон други фудбалери.
Оваа одлука не им се допаѓа на челниците на Баер Леверкузен, кои се надеваа дека ќе може да остварат голем профит поради огромниот интерес за Вирц. Како главен конкурент за неговиот потпис останува Ливерпул, но не се исклучува и можноста младата ѕвезда да заврши во Реал Мадрид, каде што се поврзува со можниот трансфер заедно со Чаби Алонсо.
