По неуспешното ребрендирање во зелена партија, сега нова агенда во Мала Речица. Откако дел од партискиот врв заврши американската црна листа, па дури и како беглаци од правдата, Демократската унија за интеграција најавува дека ќе им прави ветинг на највисоките партиски функционери – преку членовите на претседателството па се до локални ограноци.
Ветинг кој се прави зад затворени врати, не е реформа во која ќе поверува народот, коментираат за Алфа политички аналитичари. На ДУИ во 20 години на власт не им текна за проверката на партиските функционери, а сега се обидува да спаси глас повеќе пред локалните избори кои следуваат наесен.
- ДУИ се обиде да се ребрендира. ДУИ отиде во опозиција, има добри луѓе таму, мене многу ми е жал што ќе треба уште пет пати да се ребрендира и да изнајдува нови „рибренд“ амбиенти за да покаже и докаже дека народот на следните избори ќе го качи на пиедесталот за најдобра партија. Они претпеја неверојатна штета со Артан Груби, неверојатна штета. Но и птиците на гранка знаат, дека еден човек во една партија не може да биде единствениот виновник. Што значи дека трулата стуктура, стуктурата која што се уште треба да биде ставен на тапет, се уште е во ДУИ внатре. Не може човек сам, институционално да краде и да прави проневери, иако додека не се докаже тој е невин, вели Агим Јонуз – Политички аналитичар.
Секој ветинг кој нема да се прави пред очите на јавноста нема да ја врати довербата во ДУИ. Напротив, таквите најави се пресериозни, дури и за некој што сакал да покаже чесност во своите партиски редови.
- Ветинг кој не е правен институционален, консеквентен со последици и казни пред народот, на крај, не е ветинг. Мислам дека дури и малце е несериозно некој да каже ќе се прави ветинг внатре во партија, ете некој, сакал да покаже чесност. Да се разбереме, внатрепартиски што и да направиш, ти е исто како да правиш анкета, со која ќе излезеш пред јавноста, а си ја правел за свои потреби и за внатре во партијата за своја математика и своја употреба. Пресериозна и преголема тежина има зборот ветинг, да се каже дека ќе се прави внатре во партија, рече Агим Јонуз во изјава за Алфа.
Пред да замине во опозиција, челници од ДУИ бараа ветинг на сите македонски политичари, но според познавачите таквите изјави покажуваа дека по две децении на власт речиси и ништо не сработеле. Експрвиот дипломат Бујар Османи дури бараше секој кој сака да биде функционер во Македонија да добие одобрение од САД, ЕУ и НАТО. Но, откако заминаа во опозиција и повеќе партиски челници завршија на американската црна листа, се стишија во Мала Речица за ваквите предлози со кои се расфрлаа предизборно.
Демократската унија за интеграција пред четири дена најави дека започнуваат сеопфатен процес на реформи и ветинг, а ќе го предводи самиот врв на партијата на чело со Али Ахмети. Ваквите најави од Мала Речица многу наликуваат на оние од пред четири години кога ДУИ најавуваше дека ќе станува зелена партија, но останаа само најавите и рекламните спотови.
