За изборот на членовите на судскиот совет потребен е цензус од повеќе од половина од гласачите. Постапката за разрешување на претседателот на советот ќе биде јавна, а може да биде започната по барање на само два члена од ова тело.

Барање за поведување на дисциплинска постапка на член на советот, можат да побараат најмалку 10 судии. Ова се дел од предложените измени и дополнувања на законот на судскиот совет, за кои денеска се организираше првата јавна дебата.

Учесниците со поделени мислења околу цензусот за избор на судии. Генерално се согласуваат дека предложените измени имаат солиден текст.

Професор Давитковски дополни дека проширување на листата за кандидати за членови на судскиот совет е оправдана оти тоа е еден од начините да се зголеми довербата во правосудтсвото.

Претседателот на Судскиот совет Весна Дамева, очекува со новите измени да има квалитетен избор на судии, кои ќе треба да понесат одговорност ако се огрешиле.

Министерот за правда Игор Филков, се надева на квалитетни решенија за функционален и независен Судски совет. Ќе се организираат уште три јавни дебати. На крајот од годинава се очекува да се излезе со конечно решение, односно предлог за најавените измени на законот за Судски совет. Конечното законско решение се очекува да биде донесено најдоцна до јуни наредната година.