Чешкиот претседател Петр Павел предупреди дека честите нарушувања на воздушниот простор на НАТО од страна на Русија сериозно ги зголемуваат тензиите во Европа и дека Алијансата мора да биде подготвена за соодветен одговор, вклучително и воена акција.
Во изјава за Чешката телевизија, Павел истакна дека попуштањето пред Москва не е опција и дека Русија ќе се однесува онака како што ќе ѝ дозволат НАТО-сојузниците.
„НАТО мора соодветно да одговори, вклучувајќи и воен одговор. Русија многу брзо ќе сфати дека направила грешка и ги преминала прифатливите граници. За жал, ова е балансирање на работ на конфликт, но попуштањето пред злото едноставно не е можно,“ рече Павел.
Тој нагласи дека соборувањето на авиони е легитимен одбранбен механизам. „Нарушувањето на воздушниот простор е причина за активирање на одбранбените механизми, а со тоа и соборување на таков авион. И никој, ниту од наша страна ниту од руската страна, не би го посакал тоа,“ додаде чешкиот претседател.
Повод за острите реакции е неодамнешниот инцидент кога три руски ловци МиГ-31 престојувале 12 минути во естонскиот воздушен простор, по што биле придружувани од НАТО авиони.
Естонија веднаш побара консултации со НАТО, повикувајќи се на член 4 од Северноатлантскиот договор, кој предвидува заеднички консултации кога една од земјите-членки смета дека нејзината територијална безбедност е загрозена.
