Пензиските друштва предупредуваат дека зголемувањето на старосната граница за пензионирање не е поволна мерка за Македонија, каде што просечниот животен век е понизок од светскиот просек. Според нив, потребно е внимателно да се разгледа секоја промена, бидејќи таа влијае и на економскиот развој и на можноста на граѓаните да ги користат своите средства во пензија.
„Сè додека животниот век на населението е ваков, пресметките покажуваат дека покачувањето на старосната граница ќе го скрати периодот на користење на пензијата“, вели Снежана Станковиќ од „Сава пензиско друштво“. Тие истакнуваат дека ова прашање бара широка дебата со вклучување на сите засегнати страни, со цел да се обезбеди одржливост на пензискиот систем.
На 20-годишнината од реформата на пензискиот систем, претставниците на друштвата нагласија дека иако најболниот период е поминат, реформите мора да продолжат. Станковиќ потенцира дека демографските промени го загрозуваат првиот пензиски столб и нагласува важноста на развојот на вториот капитално финансиран столб, како и на третиот доброволен пензиски столб, кој обезбедува сигурни и стабилни пензии.
Пензиските друштва ги повикуваат граѓаните да инвестираат во третиот столб што порано, со цел да обезбедат активна и квалитетна старост. Според податоците на МАПАС, во вториот пензиски столб има над 620 илјади членови и над 170 милијарди денари средства, додека третиот столб брои 35 илјади членови со средства од 4,7 милијарди денари.
По тој повод, пензиските друштва ја најавија кампањата „Засади желба за стабилна иднина“, со која се промовира важноста на планираното штедење за староста.
