Питсбург – Канцеларијата на ФБИ во Питсбург утринава беше цел на напад, откако возач со автомобил удрил во задниот влез на зградата, а потоа си заминал „како ништо да не се случило“. Инцидентот властите го третираат како терористички чин, објави The New York Post.
Настанот се случил околу 2:40 часот по полноќ, кога возачот, идентификуван како Доналд Хенсон – поранешен воен офицер со историја на проблеми со менталното здравје – удрил во портата со автомобил на кој имало испишани пцовки.
По удирањето, осомничениот излегол од возилото, фрлил американско знаме преку оградата и извикал неколку зборови пред да замине. „Го третираме ова како терористички чин против ФБИ. Ова беше целен напад врз оваа зграда“, изјави специјалниот агент Кристофер Џордан за CBS News.
На местото на настанот беше повикана и единицата за детонација на бомби, но засега нема повредени. ФБИ соопшти дека е во потрага по Хенсон, кој се смета дека е невооружен.
Очевидци потврдија дека по инцидентот тој едноставно си заминал. „Го стави знамето на оградата и почна да вика, а потоа едноставно си замина како ништо да не се случило“, изјави една работничка во близина.
