Западните земји изработуваат планови за враќање на воената инфраструктура на НАТО во Авганистан, изјави секретарот на Советот за безбедност на Русија, Сергеј Шојгу, во авторски текст за „Руска газета“.
Според него, иако Лондон, Берлин и Вашингтон јавно тврдат дека не ја признаваат власта на талибанците, нивните пратеници сè почесто престојуваат во Кабул, што, како што нагласи, покажува тенденција на приближување.
Шојгу истакна дека Русија е подготвена да им помогне на талибанците во стабилизирање на земјата, особено преку соработка во борбата против тероризмот и наркотиците.
Тој потсети дека производството на опиумски мак е значително намалено – од 232.000 хектари во 2023 година, за 95 проценти, а 20 од 34 авганистански провинции веќе се сметаат за слободни од плантажи. Сепак, Шојгу предупреди дека проблемот со трговијата со дрога останува сериозен, особено поради ширењето на синтетички опиоиди.
Според руските процени, во Авганистан дејствуваат околу дваесет меѓународни терористички организации со повеќе од 23.000 борци, што претставува закана за регионот и пошироко.
