Овој викенд, македонскиот народ одбележува два значајни православни празници – Петровден на сабота, 12 јули, и Павловден на недела, 13 јули. Со нив се поврзани бројни народни верувања, обичаи и семејни слави низ целата земја.
Петровден – празник на апостол Петар
Петровден е посветен на Светиот апостол Петар и се вбројува меѓу најголемите празници по Велигден. Посебно место зазема во народната традиција, а токму на овој ден започнува и познатата Галичка свадба, која со векови ја негува македонската културна автентичност.
Свети Петар се смета за чувар на рајот и симбол на духовна сила и вистина. На овој ден често се организираат црковни служби, семејни собири и литургии, особено во местата каде што црквите го носат неговото име.
Павловден – спомен на апостол Павле, познат и како Пајаковден
Иако претходниот ден е посветен на двајцата апостоли – Петар и Павле – 13 јули е посебно одвоен како ден за честување на Свети апостол Павле, познат меѓу народот како Павловден.
Во некои краишта, особено меѓу жените, Павловден се празнува дури посветено од Петровден. Се смета за заштитен ден од пајаци, а се верува дека ако некој биде каснат од пајак на овој ден, лекувањето ќе биде тешко. Од тие причини, Павловден е познат и како Пајаковден, и во многу села и понатаму не се работи на овој ден, особено не во полето или градината.
Во гевгелискиот крај и други делови на Македонија, народното предание вели дека свети Павле бил брат на свети Петар. Се вели дека Петар бил строг и имотен, додека Павле – сиромав, но добродушен и чесен, кој ѝ помагал на сиромаштијата и бил близок со обичниот народ.
Именден
На овие два дена, именден слават сите што го носат името Петар, Павле, Пајо, Павлина и други слични имиња. Најчесто, се честита на Петровден, но во некои семејства се слави и Павловден како личен празник.
Двата празници се длабоко вкоренети во македонската духовност и народна култура. Тие претставуваат можност за собирање, молитва и почит кон апостолите, но и потсетник на богатото културно и верско наследство на нашиот народ.
