Во пресрет на гласањето за извештајот за напредокот на Македонија во Европскиот парламент, бугарски европратеници, поддржани и од грчки колеги, инсистираат на отстранување на поимите „македонски јазик“ и „идентитет“ од документот, тврдејќи дека такви термини не припаѓаат во извештај за европско приближување.
Европратеникот Андреј Ковачев од ГЕРБ изрази изненаденост од, како што рече, „огромната дипломатска и финансиска енергија“ со која Скопје се обидува да протурка дефиниции кои, според него, се надвор од мандатот на ЕУ:
„Ние не сме Институт по историја или Академија на науките, за да признаваме или не признаваме лингвистички јазици или идентитети“, изјави Ковачев.
Во Стразбур беше присутен и Љупчо Георгиевски, претседател на бугарскиот клуб „Ванчо Михајлов“, условно осуден во Македонија. Ковачев тврди дека неговото присуство имало за цел да ги информира европратениците за наводна „судска репресија“ врз македонските Бугари.
Бугарскиот европратеник Петар Волгин од „Преродба“ ги обвини еврокомесарите и известувачот за земјава дека „си ги затвораат очите“ пред, според него, „очигледни прекршувања од страна на Скопје“, само за земјата побрзо да влезе во ЕУ.
На тоа реагираше словенечката европратеничка со македонско потекло, Ирена Јовева, која на македонски им порача:
„За да постои македонскиот народ не му треба ваша дозвола, но на вас за да го признаете тоа ви треба чесност, интегритет, храброст.“
Известувачот Томас Вајц потсети дека Македонија некогаш беше лидер во евроинтеграциите, но билатералните спорови ја забавија. Тој порача дека добрососедските односи мора да се градат од обете страни.
