Неделата во Русија започна со потресна вест – утрото на 1 јули, претседателот Владимир Путин го разреши министерот за транспорт, Роман Старовоит. До попладнето, неговото тело беше пронајдено во парк на периферијата од Москва, со прострелна рана во главата и пиштол покрај него. Истражните органи претпоставуваат самоубиство.
Случајот го шокираше руското општество. „Московски комсомолец“ го нарече настанот „речиси единствен во руската историја“, потсетувајќи дека последен пат министер извршил самоубиство во 1991 година, по неуспешниот државен удар во Советскиот Сојуз.
Кремљ молчи, но шокот е очигледен
На прашање на Би-Би-Си до портпаролот Дмитриј Песков, дали го шокирала смртта на министерот, тој кратко одговори: „Секако. Мора да го шокира секој нормален човек“. Кремљ не даде дополнителни објаснувања, оставајќи простор за шпекулации.
Падот на еден функционер – трагичен крај
Повеќе медиуми го поврзуваат инцидентот со наводните злоупотреби поврзани со изградба на одбранбени утврдувања во Курскиот регион, кој Старовоит го водеше пред да стане министер. Таму, украинските сили минатата година пробија дел од фронтот, а двајца негови поранешни соработници веќе се уапсени и обвинети за проневера.
Според „Комерсант“, Старовоит можеби стравувал дека и тој ќе биде нареден на листата. Стравот од долга затворска казна и реперкусии врз семејството, според аналитичарите, можеби го натерале да посегне по животот.
„Нема излез од системот“
„Кога функционер избира смрт бидејќи не гледа друг начин да излезе од системот, тоа е страшен сигнал“, вели професорката Нина Хрушчова од Њујорк. Таа го спореди случајот со времето на Сталин, кога министри се самоубивале од страв и безизлезност.
Телевизијата премолчува, весниците алармираат
Иако темата доминираше насловни страници, државната телевизија Русија-1 ѝ посвети само 18 секунди. Очигледно, Кремљ внимава што и како се пласира преку највлијателниот медиум во земјата – телевизијата.
Симболично предупредување до власта
За многумина во политичкиот врв, трагичната смрт на Старовоит е мрачно предупредување. Кариерата што до вчера водела нагоре, денес може да заврши со пад во бездната.
„Не само што повеќе нема напредување – туку и падот може да заврши фатално“, заклучува Хрушчова.
