Северна Кореја подготвува значајно зголемување на бројот на свои војници на бојното поле во Украина, испраќајќи дополнителни 25.000 до 30.000 војници во Русија за поддршка на Москва, според украинските обавестувачки проценки.
Овој нов контингент ќе се надоврзе на 11.000 војници испратени лани во ноември, кои помогнаа да се одбранат руските позиции во регионот Курск. Според западни извори, околу 4.000 од нив загинале или се повредени, но соработката меѓу Пјонгјанг и Москва се интензивирала.
Украинските служби предупредуваат дека постои голема веројатност севернокорејските војници да учествуваат во борбите во окупираните делови од Украина, зајакнувајќи го рускиот контингент, особено во големи офанзивни операции.
Сателитските снимки покажуваат подготвки за масовен транспорт на војници преку Сибир, вклучително и теретни авиони од севернокорејскиот аеродром во Сунан, што укажува дека преместувањето на војниците можеби веќе започнало.
Украинскиот министер за одбрана, Рустем Умеров, предупреди дека лидерот на Северна Кореја, Ким Џонг-ун, ризикува да ја доведе во опасност сопствената влада со изложување на голем број елитни војници на првите борбени линии и нагласи дека Украина заедно со партнерите ги следи овие закани и ќе одговори соодветно.
