Илон Маск го пофали Трамп за напорите за мир, иако вчера се судрија околу законот за даноци
Најбогатиот човек на светот, Илон Маск, му оддаде признание на американскиот претседател Доналд Трамп за неговите дипломатски напори за смирување на конфликтите ширум светот.
„Заслугите да одат таму каде што им е местото. Доналд Трамп успешно реши неколку сериозни конфликти низ светот“, напиша Маск на социјалната мрежа X, споделувајќи објава од Трамп на неговата платформа Truth Social.
Во објавата што Маск ја сподели, Трамп се осврна на тековниот конфликт во Појасот Газа, наведувајќи дека негови претставници имале „долг и продуктивен состанок со Израелците“. Според него, Израел се согласил на условите за воспоставување 60-дневен прекин на огнот.
„За време на примирјето, ќе соработуваме со сите страни за да ставиме крајот на војната“, напиша Трамп. Тој додаде дека Катар и Египет, кои активно посредуваат, ќе го претстават конечниот предлог, и изрази надеж дека Хамас ќе го прифати договорот. „Во спротивно, нема да стане подобро – ќе биде само полошо“, предупреди Трамп.
Судир само еден ден претходно
Интересно е што пофалбата од Маск доаѓа само еден ден откако двајцата повторно влегоа во жесток јавен судир – овојпат поради контроверзниот закон за даноци и државна потрошувачка, познат како „Големиот, Прекрасен Закон“ (Big Beautiful Bill), кој го поддржува Трамп.
Маск отворено го критикуваше законот, нарекувајќи го економски деструктивен, и предупреди дека ќе доведе до натамошно зголемување на американскиот државен долг и ќе ги фаворизира „застарените индустрии“. Тој повика на формирање на нова политичка партија како алтернатива на сегашниот двопартиски систем, и најави дека ќе го финансира изборниот пораз на сите конгресмени што ќе гласаат за законот.
„Секој член на Конгресот што ќе гласа за овој закон ќе ја загуби изборната трка следната година – дури и тоа да биде последното нешто што ќе го направам во животот“, порача Маск.
Трамп возврати жестоко – му се закани дека ќе ги укине државните субвенции за компаниите на Маск и јавно го обвини дека без тие средства, би морал да ги затвори своите фирми и „да се врати во Јужна Африка“.
