Европската унија вчера и даде зелено светло на Бугарија за приклучување кон еврозоната, што значи дека земјата ќе го замени националниот лев со еврото на 1 јануари 2026 година.
Одлуката беше донесена на Самитот на ЕУ во Брисел, каде што лидерите на земјите членки ја поддржаа препораката на Европската комисија. Со тоа, Бугарија станува 21-та земја што ја прифаќа заедничката европска валута, по Хрватска, која го направи истиот чекор во 2023 година.
Првично, Бугарија планираше да го воведе еврото уште во 2024 година, но поради недоволно исполнети економски критериуми, процесот беше одложен.
Како дел од техничката процедура, Европскиот парламент и Европската централна банка ќе треба формално да се консултираат пред финалното прифаќање на еврото, но овие чекори се сметаат за рутински и немаат влијание врз временската рамка.
Бугарија, која е членка на ЕУ од 2007 година, е една од најсиромашните земји во Унијата според БДП по глава на жител. Сепак, нејзините економски показатели, вклучувајќи стабилна инфлација и јавни финансии, покажуваат позитивен тренд. Според Европската комисија, инфлацијата во земјата годинава се очекува да изнесува 3,6%, а во 2026 година да се стабилизира на 1,8%.
Сепак, планот за воведување на еврото не помина без отпор. Во февруари годинава, радикални групи организираа протести пред канцеларијата на ЕУ во Софија, фрлајќи молотови коктели, јајца и црвена боја врз фасадата на зградата. Демонстрации се одржаа и низ други градови, предводени од проруски и националистички партии кои тврдат дека усвојувањето на еврото ќе доведе до поскапување и економска нестабилност.
Противниците на новата валута собраа над 600.000 потписи барајќи распишување референдум, но парламентот двапати го отфрли предлогот – прво во 2023, а потоа повторно во мај 2025 година.
Анкетите, пак, покажуваат длабока поделба меѓу населението: според истражување на институтот „Мјара“ спроведено во мај, 54,9% од граѓаните се против воведување евро, додека 34,4% се за приклучување кон еврозоната.
