Израелската армија (ИДФ) потврди дека во текот на ноќта спровела масовен воздушен напад врз ирански нуклеарни и воени цели во Техеран, во рамки на операцијата „Рајзинг лав“. Според соопштението, учествувале приближно 50 борбени авиони, кои погодиле повеќе од 80 стратешки цели, меѓу кои и седиштето на иранското Министерство за одбрана и објекти поврзани со програмата за развој на нуклеарно оружје (SPND).
ИДФ соопшти дека нападите биле извршени под водство на Дирекцијата за разузнавање и дека се погодени и локации каде што, според Израел, иранскиот режим ја криел нуклеарната архива.
Во текот на последните три дена, во рамки на истата операција, израелските сили погодиле над 170 цели и уништиле повеќе од 720 компоненти на иранска воена инфраструктура. Израелската армија појаснува дека целта е да се нанесе максимална штета врз капацитетите за производство на нуклеарно оружје и да се спречи понатамошно зајакнување на заканата од Иран.
Меѓународната заедница досега нема официјален одговор, но се очекува реакција на Советот за безбедност на ОН поради сериозноста на ескалацијата.
