Граѓанската иницијатива „Сапорт Кочани“ ја исплати фактурата за првата набавка на компресивна облека наменета за повредените во трагичниот настан во Кочани, во вкупна вредност од 923.458 денари.
Средствата за набавката се целосно обезбедени преку донации од граѓани, компании и поддржувачи од земјава и странство, соопштија од иницијативата.
Компресивната облека е нарачана и се очекува да пристигне во Кочани околу 16 јуни. Дополнително, обезбедени се и средства за втора тура, при што на 16 и 17 јуни ќе пристигнат експерти од Бугарија кои ќе започнат со земање индивидуални мерки за новата нарачка.
Особена благодарност од „Сапорт Кочани“ беше упатена до компаниите Julius Zorn GmbH и Health 2000, кои одобрија попуст во износ од 19.600 лева, со што значително беше олеснето обезбедувањето на неопходната медицинска опрема за повредените.
„Иако некои процеси бараат време, ова е доказ дека кога има волја, има и начин. Ви благодариме на сите – граѓани, пријатели и непознати хумани срца – што покажавте што значи вистинска солидарност“, стои во соопштението од иницијативата.
