Кривичниот суд му одреди 30-дневен притвор на струмичкиот бизнисмен Ристо Крмзов, кој ќе биде спроведен во истражниот затвор „Скопје“ во Шутка. Тој е осомничен за серија тешки финансиски прекршоци, меѓу кои даночна измама, перење пари и царински злоупотреби.
Истражната постапка ја води Обвинителството за гонење организиран криминал и корупција, а предистражните дејствија започнале уште во септември минатата година. Крмзов, пак, се брани со тврдење дека станува збор за политички мотивиран прогон.
Обвинителството го поврзува со 15 правни субјекти, чии сметки се блокирани поради неплатени даночни обврски. Управата за јавни приходи потврди дека против него и фирмите се поднесени повеќе кривични и прекршочни пријави.
Крмзов ја обвини Царинската управа за намерно задржување на неговите транспортни возила, но оттаму ги отфрлија обвинувањата, посочувајќи дека само годинава против него се поднесени 17 пријави.
Обвинителството најави брифинг за новинарите на кој ќе бидат обелоденети повеќе детали од случајот, кој се оценува како еден од најголемите финансиски скандали во последните години.
