САД очекуваат силен руски одговор по нападот со украински дронови
Соединетите Американски Држави сметаат дека Русија сè уште не одговорила целосно на минатонеделниот украински напад со беспилотни летала и предупредуваат дека Москва би можела наскоро да изврши повеќеслоен и интензивен противудар, објави агенцијата „Ројтерс“, повикувајќи се на изјави од американски претставници.
Според изворите, временската рамка за евентуален целосен руски одговор сè уште не е јасна, но се проценува дека истиот би можел да се случи во следните денови. Еден висок функционер изјавил дека Русија веројатно ќе употреби различни средства – вклучувајќи ракети и беспилотни летала – за да ја засили својата одмазда. Се очекува нападот да биде „асиметричен“, односно насочен кон други цели и методи, а не само како директен одговор на уништувањето на руските стратешки авиони.
И покрај тековните ракетни и дронски напади врз Украина, американските разузнавачи проценуваат дека Русија сè уште не го започнала својот целосен одговор на украинската операција „Пајажина“, која, според проценките, уништила најмалку 12 руски стратешки бомбардери. Вашингтон проценува дека биле погодени до 20 авиони – приближно половина од бројот што го наведе украинскиот претседател Володимир Зеленски – а околу десет се целосно уништени.
Иако руското Министерство за одбрана демантираше какви било сериозни загуби и најави поправка на наводно оштетената опрема, руски воени блогери објавија дека се уништени десетици летала, вклучително и бомбардери со можност за носење нуклеарно оружје.
Западни дипломатски извори за „Ројтерс“ предупредуваат дека Москва најверојатно ќе ја засили воената кампања со симболични и разорни напади врз украински владини и безбедносни институции, со цел да испрати силна порака до Киев.
Во анализата на Мајкл Кофман од Карнеги фондацијата за меѓународен мир се наведува дека Русија би можела да се насочи кон објектите на украинската служба за безбедност (СБУ), како и кон одбранбената индустрија. Тој, сепак, нагласува дека можностите за ескалација се ограничени, бидејќи Москва веќе ја користи поголемата дел од својата воена моќ на фронтот.
„Вкупниот капацитет на Русија значително да ја ескалира воената акција – во споредба со она што веќе го прави – е сериозно ограничен,“ рече Кофман.
Во меѓувреме, претседателот Владимир Путин, според Доналд Трамп, во средата му кажал дека Русија ќе мора да одговори на нападот. Трамп, коментирајќи го разговорот на социјалните мрежи, изјави: „Му реков: ‘Не го прави тоа. Треба да го спречиш.’ Но, повторно, има многу омраза.“
Белата куќа, како и амбасадите на Русија и Украина во Вашингтон, засега не дадоа официјален коментар.
