Најновата верзија на оперативниот систем на Apple, iOS 18, бележи побрзо усвојување од својот претходник iOS 17, покажуваат најновите податоци на компанијата. Според статистиките, iOS 18 е веќе инсталиран на 88% од iPhone уредите произведени во последните четири години, вклучително и моделите од iPhone 13 па наваму. Вкупно, 82% од сите активни iPhone уреди во моментов работат со iOS 18.
Овој забрзан раст на усвојување се припишува на новите функции од платформата Apple Intelligence, како што се „Writing Tools“, „Genmoji“ и системот за автоматски сажеци на нотификации, кои значително го подобруваат корисничкото искуство.
Долгорочната софтверска поддршка и тесната интеграција меѓу хардверот и софтверот се главни предности на Apple уредите, поради што и постарите модели ги добиваат новите функционалности истовремено со поновите.
Во исто време, конкурентниот Android 15 се соочува со побавно усвојување, главно поради одложувањата кај големите производители како Samsung.
Apple веќе се подготвува за претставување на следната верзија на својот оперативен систем на годишната конференција WWDC 2025. Според гласините, новиот систем можеби нема да се вика iOS 19, туку iOS 26, и се очекува да донесе значаен визуелен редизајн.
