САД ја подготвуваат Јужна Кореја за можен судир со Кина: Пекинг се подготвува за напад врз Тајван

САД ја заоструваат својата одбранбена стратегија во Индо-Пацификот, предупредувајќи на „веројатна употреба на воена сила“ од страна на Кина за да ја смени рамнотежата на моќ во регионот. Американскиот министер за одбрана, Пит Хегсет, на безбедносната конференција во Сингапур изјави дека Пекинг се подготвува за потенцијална инвазија врз Тајван и оти Вашингтон е решен да го одврати тој потег.

Хегсет потврди дека 28.500 американски војници, стационирани во Јужна Кореја, се подготвени да реагираат не само на евентуален напад од Северна Кореја, туку и на закани од Кина. Истовремено, Пентагон разгледува и проширување на капацитетите во Јапонија, Хаваи и Гуам како дел од пошироката стратегија за одвраќање на кинеска агресија.

Напнатоста расте откако Кина минатиот месец распореди десетици воени бродови и авиони околу Тајван, симулирајќи опсада. Сателитски снимки открија и кинески „инвазивни баржи“ – мобилни понтонски платформи наменети за масовен десант на војници и техника. Како одговор, Тајпеј подигна борбени авиони и активираше одбранбени сили.

Паралелно, новоизбраниот претседател на Јужна Кореја, Ли Џе-Мјунг, најави дека ќе се обиде да воспостави дијалог со Северна Кореја, но останува под притисок од американското воено присуство кое, според експерти, сè повеќе добива регионално, а не само локално значење.

Во позадина на сето ова стои сè поагресивната позиција на кинескиот претседател Си Џинпинг, кој Тајван го смета за одметната провинција што треба да се врати под власт на Пекинг – со сила ако е потребно. Иако повеќето аналитичари предвидуваат дека Кина ќе се обиде прво со економски и дипломатски притисоци, стравот од отворен воен конфликт расте – особено во услови кога поранешниот американски претседател Доналд Трамп повторно притиска Тајван да плаќа повеќе за сопствената одбрана.

Меѓународната заедница, предупредуваат експертите, не може веќе да ја игнорира заканата од целосен воен судир кој може да предизвика глобален потрес и опасност од Трета светска војна.