Трагедија во Франција: Четворица загинати, меѓу нив и дете, во пожар во станбена зграда во Ремс
Четири лица, меѓу кои и едно дете, загинаа во катастрофален пожар што ноќеска избувна во станбена зграда во градот Ремс, на истокот на Франција. Локалните власти соопштија дека едно дете сè уште се води како исчезнато.
Пожарот започнал околу 00:30 часот по локално време, на четвртиот кат од зградата, а потоа со голема брзина се проширил по фасадата кон повисоките катови. Станува збор за зграда со вкупно 11 ката.
Во пожарот се повредени 14 лица, од кои две се во критична состојба. Меѓу повредените има и деца, потврдија итните служби.
Веднаш по избувнувањето на пожарот, над 40 жители биле итно евакуирани. Спасувачките екипи интервенирале со голем број пожарникари и возила.
Очевидец, жител на соседна зграда, сведочи дека најпрво слушнал силна експлозија, по што видел како пламени јазици ја обвиваат зградата. „Се слушаа крици од внатрешноста. Беше страшно“, изјавил сведокот за локалните медиуми.
Француските власти отворија истрага за утврдување на причините за избувнувањето на пожарот.
