Осудениот мафијаш Џовани Бруска – на слобода по 25 години затвор
Џовани Бруска, поранешен припадник на сицилијанската мафија „Коза ностра“, познат по својата бруталност и злогласните прекари „Свињата“ и „Оној што коле христијани“, официјално е ослободен на крајот од мај, откако му истече четиригодишниот условен отпуст, јавува агенцијата АНСА.
Бруска, кој самиот признал дека извршил повеќе од 100 убиства, беше уапсен во 1996 година и осуден на долгорочна затворска казна. Благодарение на соработката со италијанското правосудство, тој доби значителни олеснувања, вклучително и условна слобода која започна во 2021 година. Денес живее под нов идентитет и под постојана полициска заштита, на тајна локација надвор од Сицилија.
Бруска стана озлогласен како човекот што го активираше експлозивот во бомбашкиот напад во 1992 година при кој беше убиен водечкиот антимафијашки судија Џовани Фалконе, заедно со неговата сопруга и тројца телохранители. Атентатот претставуваше пресвртна точка во борбата против мафијата во Италија.
Освен ова, Бруска е директно одговорен и за едно од најсвирепите злосторства во историјата на италијанскиот организиран криминал – киднапирањето и убиството на 12-годишниот Џузепе Ди Матео, син на мафијаш кој се одлучил да соработува со властите. Детето било држено во заложништво цели 779 дена, пред да биде задавено и растворено во киселина — убиство што предизвика длабок потрес во италијанската јавност.
Во својата автобиографска книга „Го убив Џовани Фалконе“ (итал. Ho ucciso Giovanni Falcone), објавена во 2017 година, Бруска напиша: „Извршив повеќе од 100, но помалку од 200 убиства. И денес не можам да се сетам на сите имиња.“
При излегувањето од затвор во 2021 година, Бруска јавно им се извини на семејствата на жртвите, но неговата слобода и натаму предизвикува контроверзии.
Соработката со правосудството – пат до слобода
Италијанскиот закон им овозможува на поранешни мафијаши што ќе одлучат да соработуваат со правосудните органи да добијат ублажени казни или предвремено ослободување, дури и ако првично биле осудени на доживотен затвор. За разлика од нив, оние што одбиваат да соработуваат остануваат во строго изолирани услови, под режимот „41-бис“ – како што беше случајот со шефот на мафијата Салваторе Рина, кој почина во затворска болница во 2017 година.
Случајот на Бруска повторно ја отвори јавната дебата во Италија – дали соработката со правосудството може да биде доволен основ за простување на некои од најтешките злосторства извршени во поновата историја на земјата.
