Gmail добива нова функција: Автоматски резимеа на долгите е-пораки со помош на вештачка интелигенција
Корисниците на Gmail наскоро ќе имаат на располагање нова, исклучително практична алатка – автоматски резимирање на подолги електронски пораки, благодарение на интеграцијата со вештачката интелигенција Gemini. Она што е особено значајно е дека оваа функција ќе биде активирана автоматски, без потреба корисникот да преземе какво било дејство.
Оваа новина е дел од глобалниот тренд на се поголемото вградување на вештачка интелигенција во секојдневните дигитални алатки, пренесува технолошкиот портал TechCrunch.
Засега, автоматските резимеа ќе бидат достапни само за пораки напишани на англиски јазик.
Ограничена достапност по региони
Достапноста на оваа функција ќе варира во зависност од регионот. Во земјите на Европската Унија, Велика Британија, Швајцарија и Јапонија, функцијата ќе биде деактивирана по автоматизам, а корисниците ќе мора сами да ја вклучат преку поставките на Gmail. Во останатите делови од светот, резимеата ќе можат да се активираат или деактивираат според желбата на корисникот.
Прашање на точноста и довербата
И покрај ентузијазмот околу новата функционалност, довербата во точноста на автоматските резимеа сè уште е под знак прашалник. Потсетување на тоа е примерот со Apple, која лани мораше привремено да ја повлече функцијата за резимирање на новински известувања, откако BBC објави дека често се појавувале неточности.
И Google се соочи со критики поради својата алатка AI Overviews, која повремено нудеше недоследни и невалидни информации. Сепак, од компанијата уверуваат дека точноста е значително подобрена и дека новите функционалности се резултат на засилена контрола и подобрувања во алгоритмите.
Воведувањето на автоматските резимеа во Gmail претставува уште еден чекор кон трансформација на корисничкото искуство со помош на вештачка интелигенција. Дали оваа нова функција ќе биде практичен асистент или уште еден технолошки експеримент, ќе покаже времето – и реакциите на самите корисници.
