Трамп со „брачен совет“ за Макрон по виралниот инцидент со неговата сопруга
Американскиот претседател Доналд Трамп, за време на прошталната прес-конференција по повод заминувањето на неговиот долгогодишен соработник Илон Маск, неочекувано даде брачен совет до францускиот претседател Емануел Макрон, откако се појави видео на кое се гледа недоразбирање меѓу него и сопругата Брижит Макрон.
На новинарско прашање за спорното видео, кое експресно стана вирално на социјалните мрежи, Трамп со насмевка рече дека веќе разговарал со Макрон и му дал краток, но јасен совет:
„Секогаш погрижете се вратата да биде затворена“, изјави Трамп, очигледно алудирајќи на тоа дека вакви моменти не треба да излегуваат во јавност.
„Тоа не изгледаше добро“
Осврнувајќи се на самиот инцидент — видео на кое се гледа како Брижит Макрон го удира нејзиниот сопруг по лицето за време на нивното пристигнување во Виетнам — Трамп го оцени настанот како „многу лош“.
„Тоа не беше добро. Но, разговарав со него, и тие се добро. Станува збор за двајца одлични луѓе“, додаде американскиот претседател.
Добри односи меѓу двата претседателски пара
Вреди да се потсетиме дека Доналд и Меланија Трамп имаа повеќе средби со Емануел и Брижит Макрон уште од првиот мандат на Трамп. Тој повеќепати во јавноста истакнувал дека има „одлична комуникација“ и „цврста врска“ со францускиот претседател.
По инцидентот, Емануел Макрон во кратка изјава за француските медиуми истакна дека снимката е извадена од контекст и дека станува збор за „внатрешна шега“ и „меѓусебно задевање“.
