Ако планирате одмор во Грција, ова можеби нема да ви се допадне: Температурата на морето под просекот, нестабилно време и дождови
Температурата на морската вода долж грчкиот брег моментално е пониска за 1 до 2 степени Целзиусови споредено со истиот период минатата година, покажуваат најновите метеоролошки податоци. Како што објаснува метеорологот Иван Ристиќ, причината за ова се наоѓа во необично свежата и нестабилна пролет која го зафати Балканскиот Полуостров, вклучително и Егејскиот брег.
Според мерењата, температурите на морето моментално се движат од 19 до 21 степен. За споредба, минатата година на истите локации – Крф, Родос, Солун, Лефкада, Тасос, Закинтос и Миконос – водата била меѓу 20 и 22 степени.
Оваа информација е особено важна за оние кои планираат рана сезона на летување – крајот на мај и почетокот на јуни – бидејќи водата сè уште не е доволно загреана за удобно капење.
Ристиќ дополнително најавува дека првите две декади од јуни нема да донесат значително подобрување на временските услови. Под влијание на низок воздушен притисок, времето ќе остане променливо и нестабилно, со температури под просекот за тоа време од годината, а количината на врнежи на одредени локации ќе биде над просечните вредности.
„Ова не значи дека времето ќе биде целосно лошо или студено, туку дека нема да има екстремни горештини и сончеви денови во првата половина на јуни“, нагласува Ристиќ.
Промена кон топло време доаѓа во трета декада од јуни
Од крајот на јуни, се очекува стабилизирање на времето и пораст на температурите благодарение на приближувањето на африканскиот антициклон. Тогаш морската вода ќе достигне температури од 24 до 28°C, а воздухот ќе се искачи до 30°C на брегот, и до 35°C во внатрешноста.
Во јули ќе се почувствува вистинско лето, иако Ристиќ предупредува дека во првата половина на месецот ќе има кратки освежувања и попладневни дождови, особено во северна Грција. Сепак, третата декада од јули ќе биде исклучително топла и спарна, со температури до 40°C во континенталниот дел на земјата.
Доколку планирате летување во Грција во јуни, подгответе се на пријатно, но променливо време и релативно студено море. За стабилно и вистински топло лето, најбезбедно е да патувате кон крајот на јуни или во текот на јули.
