Во Преспа започна бербата на високосортните јаболка. Оваа година родот и квалитетот на јаболката е добар, а откупна цена на најзастапената сорта „ајдаред“ е договорено да биде 15 денари за килограм.
Има голем интерес за откуп на јаболката од локалните откупувачи и трговци, кој ќе ги извезуваат во Русија, на европскиот и на пазарите од регионот. Во моментов има сезонски работници од Албанија, а договорената дневница годинава е 1.200 денари.
-Започна бербата на сортите „муцо“, „златен делишес“ и „црвен делишес„, но тоа се мали количини кој се продаваат на локалните пазари. Годинава се очекува да се соберат од 100 до 120 илјади тони консумно јаболко од кои 30 илјади тони од сортите „муцо“, „златен делишес“ и „црвен делишес“, а 70 до 80 илјади од сортата „ајдаред“.
Засега има голем интерес за откуп на јаболката, но се уште ниту еден од откупувачите нема склучено договор за откуп со производителите, вели за весникот ВЕЧЕР, Менде Ивановски, претседател на работната група на јаболкопроизводителите во Преспа.
Тој информираше дека една од фирмите кој вршат откуп на јаболка веќе ги истакнала откупните цени кој за „ајдаред“ изнесуваат 17 денари, за „муцо“ 21 денар, за „златен делишес“ 22 денари и „црвен делишес“ 24 денари за килограм. Производителите се задоволни со овие откупни цени и се надеваат дека и другите откупувачи ќе понудат слични цени.
Ивановски се надева дека нема да имаат проблеми со сезонски работници, бидејќи покрај албанските берачи интерес за берење на јаболка пројавиле и берачи од земјата и од регионот.
-Во моментов има сезонски работници од Албанија. Се надевам дека додека трае бербата нема да се затвори границата со Албанија. Покрај албанските берачи годинава интерес за берење јаболка пројавија и домашните, а и сезонските работници од регионот.
Производителите на јаболка се договорија дневницата за берачите да биде 1.200 денари, додава Ивановски.
Покрај на рускиот пазар годинава македонското јаболко ќе се пласира и на пазарите во Хрватска и Босна и Херцеговина кои имаат недостиг на сопствено производство, а постои интерес и за откуп на македонските јаболка од Саудиска Арабија и Либија.
Извор: Вечер Прес.
