Моди и дава „целосна слобода“ на војската – Индија на раб на конфликт со Пакистан
По смртоносниот напад во индискиот дел на Кашмир, во кој загинаа 26 цивили, индискиот премиер Нарендра Моди ѝ даде на армијата „оперативна слобода“ да одговори како што смета за соодветно. Ова го потврди владин извор за AFP, пренесе агенцијата Бета.
На состанок со врвниот воен врв, Моди изјавил дека индиските вооружени сили имаат целосна слобода самостојно да одлучат за целите, моментот и начинот на евентуалниот одговор. „Премиерот го потврди ставот дека Индија е решена да нанесе одлучувачки удар врз тероризмот и ја изрази довербата во капацитетите на нашата војска“, изјави неименуваниот извор.
Кашмир повторно во центарот на криза
Нападот се случи на 22 април во Пахалгам – туристички град во Кашмир под индиска администрација. Група вооружени напаѓачи усмрти 26 луѓе, во еден од најкрвавите напади врз цивили во регионот во последните две децении. Иако никој досега не ја презеде одговорноста, Њу Делхи веднаш го обвини Исламабад.
Пакистан остро ги негираше обвинувањата и побара „неутрална меѓународна истрага“. Ситуацијата меѓу двете нуклеарни сили се влоши, со дипломатски санкции од двете страни и повици до граѓаните да се повлечат од територијата на соседната земја.
Размена на оган долж Контролната линија
Последниве неколку ноќи, индиските и пакистанските сили разменуваат оган со лесно вооружување долж Контролната линија – де факто границата што го дели Кашмир помеѓу двете држави. Индија и Пакистан го поделија регионот во 1947 година, веднаш по прогласувањето независност.
Сепак, и двете страни и понатаму имаат територијални претензии врз целата област, која веќе децении претставува точка на постојан конфликт. Од 1989 година, во индискиот дел на Кашмир се води вооружено востание, при што животите ги загубиле десетици илјади луѓе.
