Нови тензии меѓу Индија и Пакистан: Размена на оган долж линијата на контрола и прекин на дипломатски и трговски врски
Индија и Пакистан третa ноќ по ред разменуваат оган долж линијата на контрола (LOC), која ги раздвојува двете земји во спорниот регион Џаму и Кашмир. Според соопштението на индиската војска, пакистанските сили отвориле оган со малокалибарско оружје, на што индиските трупи веднаш возвратиле. Засега нема официјална потврда од Исламабад за инцидентот.
Овие нови судири доаѓаат во време на сериозно влошување на односите меѓу двата соседa, по смртоносниот напад врз туристи во индиската сојузна држава Џаму и Кашмир, при што загинаа 26 лица. Индија го обвини Пакистан за вмешаност во нападот, обвинувања кои Исламабад остро ги отфрли.
Како реакција, Индија најави серија мерки за прекин на дипломатските и трговски односи. Индискиот министер за надворешни работи, Викрам Мисри, соопшти дека Индија се повлекува од историскиот договор за споделување на водите од реката Инд, потпишан во 1960 година. Според него, Индија нема да го почитува договорот сè додека Пакистан, како што рече, не се откаже од поддршката за прекуграничниот тероризам.
Дополнително, Индија го затвори единствениот копнен граничен премин со Пакистан, забрани транспортни врски и го укина влезот за пакистански државјани со специјални јужноазиски визи. Пакистанските државјани кои веќе се во Индија имаат рок од 48 часа да ја напуштат земјата.
Надворешниот политички судир се прошири и на дипломатско ниво – сите советници за одбрана во пакистанската амбасада во Њу Делхи се прогласени за „персона нон грата“ и имаат седум дена да ја напуштат земјата. Индиските дипломати во Исламабад ќе бидат повлечени, а бројот на вработени во индиската мисија ќе се намали од 55 на 30.
Пакистанскиот премиер, Шехбаз Шариф, во изјава на воен настан во Аботабад, рече дека Пакистан е „отворен за учество во каква било неутрална, транспарентна и кредибилна истрага“ за нападот. Исламабад повика на меѓународна истрага за убиствата на туристите.
Одговорноста за нападот ја презеде мала, непозната милитантна група наречена „Отпорот на Кашмир“, која индиските безбедносни служби ја поврзуваат со пакистанските организации Лашкар-е-Таиба и Хизбул Муџахидин. Пакистан ги отфрли овие обвинувања, тврдејќи дека Лашкар-е-Таиба е неактивна група без капацитет да планира напади од територијата на Пакистан.
