Денеска се случи драматичен инцидент во Источно Сараево, каде припадници на државната Агенција за истраги и заштита (СИПА) се обиделе да го уапсат претседателот на Република Српска, Милорад Додик.
Сепак, акцијата беше спречена од Министерството за внатрешни работи на Република Српска, кое интервенираше и ги спречи агентите на СИПА да влезат во зградата на Административниот центар на Владата на РС.
Инцидентот се случил додека Додик имал средба со претставници на Градот Источно Сараево. Според информациите на Klix.ba, полицијата на РС со долги цевки се поставила пред зградата и физички ја блокирала акцијата, што медиумите во БиХ веќе го оквалификуваат како „вооружен бунт“.
Од СИПА потврдиле дека се обиделе да постапат по наредба на Судот на БиХ, но истакнале дека за време на настанот не била употребена сила.
Овој развој на настаните уште еднаш ја отвора темата за затегнатите односи меѓу државните и ентитетските институции во БиХ, и фрла светло врз сѐ покомплицираната политичка ситуација во земјата.
Од средината на март годинава, за претседателот на Република Српска, Милорад Додик, претседателот на парламентот Ненад Стевандиќ, и премиерот на РС, Радован Вишковиќ, е распишана централна потерница. Причината е нивното непојавување на распит пред Обвинителството на Босна и Херцеговина, и покрај официјалниот повик.
Овие високи функционери се осомничени за напад врз уставниот поредок на БиХ – сериозно обвинение што дополнително ги влошува веќе тензичните односи меѓу државното и ентитетското ниво на власт.
Судот на БиХ веќе побара од Интерпол да ја преиспита својата одлука со која претходно беше одбиено издавање на црвена потерница за раководството на Република Српска. Сега се чека дали оваа постапка ќе биде ревидирана и какви ќе бидат понатамошните чекори на меѓународно ниво.
