Рош најави инвестиција од 50 милијарди долари во САД – нови фабрики, центри и илјадници работни места
Швајцарската фармацевтска компанија Roche планира да инвестира до 50 милијарди долари (околу 43,5 милијарди евра) во САД во наредните пет години, со цел проширување на производствените капацитети и создавање нови истражувачки центри. Веста доаѓа само две недели по најавата за слични милијардски вложувања од страна на Novartis, исто така со седиште во Базел.
Според соопштението на компанијата, инвестицијата ќе биде насочена кон постојни локации, како и изградба на нови производни погони. Се очекува да се отворат околу 12.000 нови работни места – од кои 1.000 директно во компанијата, а останатите во логистиката и поддршката.
Генска терапија и иновации во лекови за слабеење
Во Пенсилванија се планира изградба на најсовремен погон за производство на терапии базирани на гени. Дополнително, Roche ќе гради нов центар од 900.000 квадратни метри за поддршка на растечката линија лекови за слабеење, иако точната локација сè уште не е објавена.
Во сојузната држава Масачусетс ќе биде отворен нов истражувачко-развоен центар фокусиран на вештачка интелигенција и болести како кардиоваскуларни, бубрежни и метаболички нарушувања.
Повеќе извоз отколку увоз на лекови
„Овие инвестиции ја покажуваат нашата долгорочна посветеност на САД како стратешки партнер во иновациите и производството“, изјави извршниот директор на компанијата, Томас Шајнекир.
Со комплетирање на новите капацитети, Roche ќе извезува повеќе лекови од САД отколку што ќе увезува – што претставува значаен пресврт за швајцарскиот гигант.
Roche е светски лидер во биотехнологијата, познат по лекови како Avastin, Herceptin, Tamiflu и Ocrevus, со повеќедецениско присуство на американскиот пазар и влијателна улога во фармацевтската индустрија.
