Украина е наводно подготвена да прифати загуба на 20% од територијата – но без правно признавање
Според пишувањето на Њујорк Пост, повикувајќи се на анонимен висок претставник на американската администрација, Украина наводно изразила подготвеност да се откаже од до 20% од својата територија – но само доколку тоа се третира како „де факто“ реалност, а не како „де јуре“ правно признавање.
„Украина, изгледа, е спремна да се откаже од дел од територијата, се додека тоа не се признава формално“, изјавил изворот за американскиот медиум.
Како што се наведува, претставници на Киев во минатонеделните разговори со американска делегација изразиле особена загриженост околу делот од потенцијалниот мировен договор кој се однесува на териториите што Русија ги анектираше по спорните референдуми.
Прашањето за териториите клучна тема во контактите САД–Русија
Според Волстрит Журнал, специјалниот пратеник на американскиот претседател, Стив Виткоф, разговарал со рускиот претседател Владимир Путин токму на темата „територијални прашања“ во рамки на можниот мировен процес за Украина. Виткоф наводно изјавил дека ова прашање „може делумно да се реши“.
Истовремено, Блумберг јавува дека Вашингтон, во рамки на пошироката мировна иницијатива, разгледувал и можност за официјално признавање на Крим како дел од Руската Федерација – иако конечна одлука во врска со ова сè уште не е донесена.
Средбата помеѓу Путин и Виткоф се одржала на 11 април во Претседателската библиотека во Санкт Петербург и траела околу четири и пол часа.
Москва очекува продолжување на дијалогот
Портпаролот на Кремљ, Дмитриј Песков, изјави дека Москва очекува ваквите дипломатски контакти да продолжат.
И помошникот на рускиот претседател за меѓународни прашања, Јуриј Ушаков, потврди дека САД веќе ги анализирале сигналите што Москва ги испратила преку Виткоф.
