Велигден – празникот на светлината и духовниот препород
Велигден, празникот на светлината и победата на животот над смртта, за православните верници не е само ден на радост, собири и празнична трпеза. Тоа е и миг на длабока внатрешна рефлексија, тивка молитва и духовно прочистување. Додека домовите се исполнуваат со мирисот на обредни јадења, свеќи се палат, а јајцата се бојат, душата копнее по нешто повисоко – зборови што носат мир, простување и надеж.
Во таа духовна потрага, Послание 50 (Псалм 50) зазема посебно место во срцето на верниците. Сметанa за една од најмоќните молитви во православната традиција, овој псалм зборува за покајание, божествена милост и бескрајната љубов на Бог. Тој се изговара во тишината на утрото, пред иконата или во осаменост, со вера дека токму тие зборови ја прочистуваат душата, даваат духовна сила и стануваат невидлив штит пред сè што е тешко и непознато.
Верувањето е дека токму оваа молитва на Велигден претставува симболичен пресврт – не само Христовото воскресение, туку и секое поединечно духовно воскресение. Таа не нè потсетува само на страдањето, туку и на силата на простувањето и почетокот одново.
1 Помилуј ме, Боже, поради големата Твоја милост, и заради големата Твоја
добрина избриши ги беззаконијата мои.
2 Измиј ме темелно од моето беззаконие и очисти ме од мојот грев,
3 зашто престапите мои ги знам и мојот грев е секогаш пред мене.
4 Против Тебе, само против Тебе згрешив и пред Тебе зло извршив, така што Ти си праведен кога ќе пресудуваш и беспрекорен кога ќе судиш.
5 Ете, грешен сум роден, грешник уште од кога ме зачна мајка ми.
6 Ти ја сакаш вистината во срцето, и внатре во мене ме учиш на мудроста Твоја.
7 Пороси ме со исоп, и ќе бидам чист; измиј ме и ќе бидам побел од снег.
8 Дај ми да чујам радост и веселба, нека се зарадуваат коските што Ти ми ги здроби.
9 Одврати го лицето Свое од гревовите мои и избриши ги сите мои беззаконија.
10 Создај чисто срце во мене, Боже, и нов и прав дух стави во мене.
11 Не отфрлај ме од лицето Свое и Светиот Дух Твој не одземај Го од мене.
12 Врати ми ја радоста на спасението од Тебе и благороден дух зацврсти во мене.
13 Тогаш ќе ги научам престапниците да одат по Твоите патишта, и грешниците
кон Тебе ќе се обраќаат.
14 Ослободи ме од пролеаната крв, Боже, Боже на моето спасение, и јазикот
мој ќе пее за Твоето избавување!
15 Господи, отвори ја устата моја, и устата моја ќе ја објави похвалата Твоја;
16 зашто, жртви не ти се мили, кога би ти принел сепаленици, Ти не би ги примил.
17 Жртвата пред Бога е срушен дух; срце понизно и смирено Ти, Боже, не отфрлуваш.
18 Господи, направи му добро на Сион, според благоволението Свое, обнови ги
ѕидовите ерусалимски.
19 Тогаш ќе Ти бидат угодни жртвите на правдата, вознесувањата и жртвите
сепаленици; тогаш на Твојот олтар ќе принесуваат телци.
