Заробените кинески државјани во Украина: „Русија не вовлече во замка“
Двајцата кинески државјани, кои биле заробени додека се бореле на страната на руската армија во источна Украина, изјавија на прес-конференција во Киев дека биле „намамени“ од Москва и дека нивното учество во конфликтот било резултат на измама.
Според украинската новинска агенција „Интерфакс-Украина“, мажите – чии идентитети не се откриваат – нагласија дека кинеската влада не знаела дека тие биле регрутирани од страна на руската војска, туку дека потпишале договори преку посредници, убедени дека станува збор за легална и мирољубива ангажираност.
Едниот од нив, кој ја изгубил работата за време на пандемијата со Ковид-19, изјави дека сакал да работи како медицински техничар на фронтот. „Сакав да бидам болничар. Верував дека ќе помагам, не дека ќе завршам ранет и заробен. Предадов се кога сфатив во што сум се впуштил“, рече тој.
Тој посочи дека кинеските медиуми често го прикажуваат пријателството со Русија во позитивно светло, што, според него, создава искривена слика која може да доведе до манипулации. „Сè што ни кажаа Русите се покажа како лага. Ова беше замка“, изјави тој.
Вториот заробеник, кој доаѓа од финансиски стабилно семејство, рече дека во Русија дошол како турист, без никаква претстава дека ќе заврши во војна. „Не знаев речиси ништо за Украина, а уште помалку очекував да бидам во униформа на бојното поле“, изјави тој.
Двајцата велат дека биле заробени на 8 април, веднаш по нивното пристигнување на фронтот, и тврдат дека не учествувале во борби ниту во убиства на украински војници.
Само ден подоцна, украинскиот претседател Володимир Зеленски објави дека најмалку 155 кинески државјани моментално се борат во редовите на руската армија и дека кинеските власти се свесни за, како што ја нарече, „системска кампања на регрутација“ организирана од Москва.
Портпаролот на кинеското Министерство за надворешни работи, Лин Џијан, ги отфрли овие тврдења, оценувајќи ги како „неодговорни“.
Заробените Кинези изразија желба да се вратат во татковината и изјавија дека се подготвени да се соочат со последици, бидејќи кинеските закони строго го забрануваат учеството на нејзини државјани во вооружени конфликти во странство – без разлика на страната.
