Бројот на загинатите во земјотресот со јачина од 7,7 степени според Рихтеровата скала, кој го погоди Мјанмар пред десет дена, достигна најмалку 3.515 лица, додека 210 се уште се водат како исчезнати, покажуваат податоците што во понеделникот ги објави војската на Мјанмар.
Најголемиот број на жртви се наоѓаат во и околу Мандалеј, вториот по големина град во земјата, каде што загинале повеќе од 2.100 луѓе.
Работата на спасувачките тимови е дополнително отежната поради обилните дождови и ветрови, кои ги оштетиле шаторите и теренските болници на меѓународните тимови. Метеоролозите предупредуваат на можни поплави и одрони поради претстојната врнежлива сезона.
Властите прогласија крај на операциите за пребарување и спасување и го насочија својот фокус на извлекување на телата и расчистување на остатоците. Извештаите укажуваат дека мртовечниците се преполни, а масовни кремации се изведуваат на отворено, јавува ДПА.
Во многу од погодените области се шири неподнослива миризба од трупови, што го отежнува престојот на хуманитарните работници и локалните жители. Поради бројните последователни земјотреси, многу жители се плашат да се вратат во своите домови и спијат на отворено.
Покрај новите земјотреси, ситуацијата дополнително се влошува поради честото губење на интернетот, што ја прекинува комуникацијата и воздушната координација.
Во некои делови на Мјанмар, ситуацијата е катастрофална. Весникот „Иравади“ извештува дека повеќе од 80% од инфраструктурата во Сагаинг Сити е уништена.
Хуманитарната состојба продолжува да биде тежок предизвик, особено за ранливите групи кои веќе се погодени од внатрешни конфликти.
