На ден 01.07.2024 година, на службената е-маил адреса на Управата за финансиска полиција доставени се три претставки, во кои е наведено дека Општата Болница „ОНЕ ХОСПИТАЛ“– Тетово, нема исплатено парични средства по основ на личен доход за месец 12/2023, 01/2024, 02/2024, 03/2024, 04/2024, регрес за годишен одмор, К-15 и додаток за ноќен труд, како и дека надоместокот по основ на дежурство од месец август 2023 година воопшто не се исплаќа. Дополнително во истите претставки е наведено дека не се исплатени парични средства за прекувремена работа и дека на вработените не им е овозможено целосно користење на деновите од годишен одмор наведуваат од Управата за финансиска полиција.
„Со оглед дека наводите од пријавата се однесуваaт на дејствија кои се предмет на надлежност на Државниот инспекторат за труд од наша страна на ден 22.07.2024 година е доставен допис до Државниот инспекторат за труд за нивно понатамошно постапување и по завршување на проверките да нѐ известат за резултатите од истите.
Од страна на Државниот инспекторат за труд – Тетово, а со цел проверување на наводите на претставките бил извршен вонреден инспекциски надзор кај гореспоменатиот работодавец при што од нивна страна билo констатирано дека од страна на одговорното лице било сторeно кривично дело по член 166 став 1 и 2 од КЗ и врз основа на тоа државните инспектори за труд, а врз основа на член 20 од Законот за инспекција на трудот до ОЈО – Тетово било доставено известување.
Следствено на тоа на ден 14.11.2024 година, од страна на Управата за финансиска полиција до ОЈО Тетово, е доставено известување по кое на ден 20.01.2025 година е добиен Одговор на барање во врска со поднесено известување од страна на јавен обвинител од ОЈО – Тетово, кој истовремено е доставен и до пријавителите и до Државниот инспекторат за труд – ПЕ Тетово, во кој е наведено дека од страна на ОЈО Тетово е водена истражна постапка против Оне Хоспитал и одговорното лице во правното лице по повод пријавен кривично правен настан за неисплатени плати и придонеси за сите вработени во Општата болница Оне Хоспитал Тетово, за сторено кривично дело по член 166 од КЗ, по основ на која постапка пред Основен суд Тетово на ден 09.10.2024 година било доставено обвинение и на ден 18.10.2024 година од страна на истиот суд со пресуда К.бр.818/24 како правното лице така и управителот на правното лице се огласени за виновни и казнети по закон, судски акт кој претставува правен основ за побарување на плати и придонеси како и други договорени додатоци од плата за сите вработени во Болницата.
По однос на дел од претставките на докторите за неисплатен регрес од годишен одмор, додаток за ноќен труд, односно неисплатени дежурства, прекувремена работа и неискористени годишни одмори, сите овие претставуваат основи за граѓанско побарување на договорени права, преку поднесување на граѓанска тужба пред надлежен суд, односно јавното обвинителство не е надлежно за постапување по граѓанско правни односи пред граѓански суд, особено за посочените договорени права на вработените.
Имено, во Одговорот Јавниот Обвинител навел дека сите вработени од Општата Болница но и самите пријавители можат да се обратат до Основен Суд Тетово за добивање на препис од погоре посочената пресуда, како потребно за понатамошно остварување на нивните права и интереси во граѓанска постапка“, стои во демантот.
